Albisteak

Euskarabideak, 34 toki entitatek eta gizarte eragileek "Euskera ahora" kanpaina plazaratu dute helduek euskaraz ikastea sustatzeko

Nafarroako Gobernuaren Memoria eta Bizikidetza, Kanpo Ekintza eta Euskara Departamentuak, Euskarabidea – Euskararen Nafar Institutuaren bidez, helduek euskara ikas dezaten sustatu nahi du eta horretarako "Euskera ahora" kanpaina antolatu du. 

Kanpaina antolatzeko 34 toki entitate eta helduei euskara irakasteko alorreko eragileak aritu dira elkarlanean Euskarabidearekin: Zubiarte euskaltegi publikoa, hizkuntza-eskola ofizialak eta AEK, IKA eta bai&by erakundeetako euskaltegiak. Izan ere, denen helburua da euskararen ezagutza eta erabilera indartuko duten hiztun berriak irabaztea. 

Iaz abiaturiko bideari jarraipena eman dio kanpainak eta azpimarra jarri du bizitzako une berezietan, baita orainaren garrantzian ere. Orain baita euskarari ekiteko unea, euskaltegian izena emateko garaia. 

Kanpainak, halaber, berrikuntzak ekarri ditu. Hasteko, Ingura plataforma digital publikoa aurkeztu da. Inguraren bidez, euskara ikastea guztien eskura jarri nahi da. Egun A1 maila egiteko aukera dago, eta bi modalitatetan egin daiteke: nork bere basa edo euskaltegi batean izena emanda, ikastaroa tutoretzapean egin ahal izateko. 

Eta, beste alde batetik, doakotasunaren alde egindako urratsak aurkeztu dira. Horri dagokionez, euskara ikasteko bideari heltzen dioten ikasleei eman zaie lehentasuna; hau da, ikastegi publiko zein euskaltegi homologatuetan A1 maila egingo duten ikasleei. Euskarabideak % 100era arteko laguntzak emanen ditu maila horretan. Gainontzeko mailetan, 475 eurora arteko dirulaguntzak jaso ahal izanen dituzte aurrez aurreko ikastaroetan, eta laguntza horiek bateragarriak izanen dira toki entitateek ematen dituzten laguntzekin.

Gainera, administrazioan lan egiten duten pertsonek laguntza orokor hauek ere jaso ahal izango dituzte, eta ez soilik orain arte zituzten laguntza espezifikoak. Bestalde, euskara-ikastaroen modalitate desberdinak lagunduko dira, hala nola iraupen laburreko ikastaroak, familien barnetegiak eta gaur egun euskaltegietatik egiten diren eskaintza berriak. Laguntza bi epetan ordainduko da, abenduan eta ikasturtea amaitzean. 

Ikastaroen hasiera eta bukaera kontuan hartuta, bi modalitatetan banatu dira laguntzak. 

• A modalitatea: 2025eko urtarrilaren 1etik abuztuaren 31ra bitartean hasi eta 2025eko irailaren 30erako bukatuta dauden ikastaroak.
• B modalitatea: 2025eko irailaren 1etik abenduaren 31ra bitartean hasi eta 2026ko ekainaren 30erako bukatuta dauden ikastaroak.

B modalitatean eskaerak aurkezteko epea irailaren 1etik urriaren 31ra arte egonen da zabalik. 

 

Dirulaguntzen inguruko informazio gehiago: hemen 

 

---