Euskara Langai

Euskara Nafarroako alor sozioekonomikoan

Beraien lan jardueran euskara txertatzeko lanean dihardute Nafarroako enpresa askok. Batzuk hasiberriak dira eta beste batzuk urteak daramatzate euskara beraien egunerokoan txertatzen; tamaina, eskualde eta jarduera ekonomiko ezberdinetako enpresak. Bakoitzak bere aldetik urrats garrantzitsuak eman ditu arlo sozioekonomikoan euskara txertatzeko lanean, bezeroak hobeto artatzeko, ikusgarritasuna lortzeko edo euskara lehiakortasunerako giltzarri dela ikusi dute. Horregatik ekin diote bideari.

Euskarak alor sozioekonomikoan duen garrantziaz jabetuta, enpresa eta entitate ezberdinen praktika on horiek guztiak azaleratu nahi ditugu, euskara txertatzeko lanean ari direnei bultzada eman eta horretan hasi nahi dutenei erakusleiho bat eskainiz.

Euskara langai proiektua sortu dugu, Nafarroan hizkuntza kudeaketarekin erantzukizuna duten enpresen elkargune izateko asmoz. Barrura begira edo-eta bezeroekiko harremanetan euskara ere baliatzen duten edo baliatu nahi duten gero eta enpresa gehiago identifikatzea, elkartzea eta sare sendo bat osatzea da helburua, gizartearen isla izango dena. Bakoitzak bere egoera dauka, bere helburuak, bere erritmoa… baina helburua da elkarri laguntzea, elkarrengandik ikastea, ereduak zein baliabideak eskaintzea eta elkarrekin erronkari aurre egitea Nafarroako alor sozioekonomikoan euskararen erabilera hobetzen laguntzeko.

Herritarrekiko Harremanetarako Kontseilariak egistamoaren eta jardunaldiaren berri eman zuen prentsaurreko batean.

Jardunaldia

2022ko maiatzaren 24an Iruñeko Baluarte Jauregian Euskara langai jardunaldiarekin ekin genion bideari. Bertan, euskara txertatzen eredu diren zenbait enpresaren praktika onak ezagutu genituen, Nafarroako Gobernuak eskaintzen dituen baliabideen berri izan genuen eta Nafarroatik kanpo dauden hainbat praktikaren inguruko informazioa ere jaso genuen. Bai Euskarari Elkartea arduratu zen jardunaldiaren kudeaketaz.

Jardunaldira bertaratuko ziren enpresetako ordezkariak identifikatuta sentitzea nahi genuen, beraiek ere beren enpresetan euskara txertatzeko aukera dutela eta etorkizunean enpresa eredu gisa aritzen ahal direla ikusarazi nahi genien. Euskara lan-munduan txertatu nahi duten enpresa guztien ispilu dira jardunaldian adibideak eman zituztenak. Izan ere, edozein urrats txiki lorpen handia izan daiteke euskara lan-munduan txertatzeko.

Nafarroan aurrekaririk gabeko esperientzia izan zen Baluarten bizi izan genuena. Izan ere, hainbat tamaina, eskualde eta jarduera ekonomikotako enpresak elkartu ziren, eta euskararen inguruko erronkei nola aurre egin ikasi genuen elkarrekin. Hurrengo bideoan jardunaldia osorik ikusteko aukera dago.

Multimedia

Parte-hartzaileen aurkezpenak

EUSKARABIDEA

MAPSA

OREKA IT

LABRIT

OSASUNA

LANABES

EUSKARAGILEAK

INDEUS

Aldizkaria