Albisteak

Ollo lehendakariordeak eta Euskarabideko zuzendariak, Jabi Arakamak, Nafarroako Ikastolen Elkarteko ordezkaritza bat eta Nafarroa Oinez 2025 antolatzen duen Paz de Zigandako zuzendaria hartu dituzte

Bigarren lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok, eta Euskarabideko Zuzendariak, Jabi Arakamak, Nafarroako Ikastolen Elkarteko ordezkaritza bat hartu dute, baita Paz de Zigandako zuzendaria ere, urriaren 19an Atarrabian egingo den Nafarroa Oinez 2025 euskararen aldeko festa dela eta.

Nafarroako Ikastolen Elkarteko ordezkaritza Oier Sanjurjo lehendakariak, Josu Reparaz erakunde horretako zuzendariak eta Iñaki Erroz Atarrabiako Paz de Ziganda Ikastolako zuzendariak osatu dute.

Horrela, Paz de Ziganda Ikastolak, 1970ean sortutakoak, hirugarren aldiz antolatuko du ikastolen festa Nafarroan, 1991 eta 2010 urteen ostean. Oraingo honetan, eta bere sei hamarkadetako prestakuntza, hezkuntza eta euskararen sustapenarekin bat eginez, Atarrabiako ikastolak Zangozako Ikastolaren lekukoa hartu du.

Hain zuzen ere, Nafarroako ikastolen eta euskararen aldeko festaren 44. edizioak "Buruz, Bihotzez, Oinez" leloa izango du aurten. Hiru hitz horiek hiru kontzeptu zehatz adierazten dituzte, Paz de Ziganda Ikastolatik adierazi dutenez: “BURUZ, buruarekin, arrazoiarekin, helburu argi batekin, baina gure nortasun-ezaugarriak ahaztu gabe. Etorkizunari begira dagoen eredu ekintzaile, pedagogiko, inklusibo eta konprometituan sinesten dugulako”; “BIHOTZEZ, bihotzez, sentimenduz eta emozioz. Pertsona erdigunean jartzen duen proiektua garelako, bere emozioak eta sentimenduak balioztatuz. Euskara eta euskal kultura maite ditugulako"; eta “OINEZ, mugimenduan, aurrera eginez, dinamikoa. Herritarren mugimendu arduratsua garelako eta izaten jarraitu nahi dugulako: plurala, modernoa, ekologikoa eta osasuntsua".

Nafarroako Jauregian izandako bileran, Nafarroako Ikastolen Federazioko eta, aldi berean, Nafarroa Oinez-eko ordezkariek zehatz-mehatz azaldu dituzte hilabete hauetan zehar urriko hirugarren igandera arrakastaz iristeko egin diren lanak. Era berean, Ollo lehendakariordeak ospakizunera joango dela baieztatu nahi izan du, eta eskerrak eman dizkie bertaratutakoei, bai eta komunitate euskalduna osatzen duten Nafarroako familia guztiei ere, "gure hizkuntza propioa den aberastasun iturri hori, euskara, sustatzen etengabe egindako ahaleginagatik".

Azkenik, Ollok Nafarroa Oinez bezalako jai baten garrantzia azpimarratu nahi izan du, izan ere, Nafarroan milaka familiak euskara bizirik mantentzeko egiten duten ahalegin kolektiboa irudikatzen du, eta aldi berean, Foru Komunitatearen kohesio sozialari laguntzen dion irakaskuntza eredu kooperatibo honen balio garrantzitsua aitortu du.

---