Albisteak

Nafarroako Gobernuak Nafarpresek Arruazun antolatutako tokiko prentsari buruzko V. jardunaldian parte hartu du

Nafarpres Nafarroako Tokiko Prentsaren Elkarteak Nafarroako Tokiko Prentsaren V. Jardunaldia ospatu zuen urriaren 29an, Arruazun. Komunikazioko profesionalak, erakundeetako ordezkariak eta lurralde-garapenarekin lotutako eragileak bildu ziren topaketan, gertuko kazetaritzaren erronka nagusiez hausnartzeko eta tokiko hedabideen lana aitortzeko.

Jardunaldian sektorearen etorkizunerako funtsezko gaiak landu zituzten, hala nola informazio-basamortuen sorrera, belaunaldi-erreleboa, argitalpenen jasangarritasuna eta Nafarroako lurralde guztietan gertuko informazioa, zorrotza eta kalitatezkoa jasotzeko aukera bermatzeko beharra.

Topaketan Nafarpresen III. Sariak ere banatu zituzten. Aurten, tokiko iragarle onena aitortzeko kategoria gehitu zuten, berrikuntza nagusi gisa. Horrez gain, Tokiko Prentsaren II. Eskola Sariak banatu zituzten, ikasleen artean kazetaritzaren ezagutza sustatzeko.

Tokiko prentsa, lurralde-kohesiorako funtsezko osagaia

Jardunaldia 16:30ean hasi zen, ongietorri instituzionalarekin. Víctor Goñi Nafarroako Gobernuko Komunikazio zuzendari nagusiak eta Sandra Goldáraz Nafarpresen presidenteak hartu zuten parte. Topaketa Ana Ollo lehendakariordearen hitzaldiarekin amaitu zen. Bertan Ollok sari-banaketan ere aritu zen.

Gobernuko lehendakariorde eta Memoria eta Bizikidetzako, Kanpo Ekintzako eta Euskarako kontseilariak azken tren-istripuaren biktimak gogoratu zituen bere hitzaldian, eta tokiko hedabideen zereginari buruzko hiru ideia nabarmendu zituen. Hala, lehenik, tokiko garapenerako eragile eta lurraldetik hurbil dauden aktore gisa egiten duten lana azpimarratu zuen. Bere ustez, informazioa beti da despopulazioaren aurka egiteko tresna egokia. Bigarrenik, herriz herri, bailaraz bailara eta auzoz auzo egiten duten ekarpena eskertu zuen, informazioa jasotzeko eskubidea bezalako ondasun komun baten alde. Informazio hori gertukoa eta kalitatezkoa da.

Eta, azkenik, gai horri eta Nafarpresek bazkideei zuzendutako sariei lotuta, belaunaldi berriekin lan egitearen garrantzia nabarmendu zuen. Bakearen eta Bizikidetzaren balioak lantzea funtsezkoa da demokrazia bera indartzeko, baita errespetua eta informazio fidagarria bezalako balioak sustatzeko ere. Horixe egiten dute, halaber, berak zuzentzen duen departamentuan.

Informazio-basamortuak, proiektu berriak eta erakundeen arteko lankidetza

Egitarauak Iñaki Zabaletaren hitzaldiarekin hasi zen. Informazio-basamortuez eta zenbait lurraldetan komunikabideak desagertzeak herritarrentzat dituen arriskuez aritu zen.

Ondoren, Jon Urtasunek Mailope komunikazio-proiektu berria aurkeztu zuen. Hilabetekaria, mailope.eus webgunea eta Aralar Irratia biltzen ditu proiektuak, papera, irratia eta komunikazio digitala uztartuta. Etapa berrian irudia eta maketazioa berritu dituzte, atal eta eduki berriak gehitu dituzte, eta webguneak aldizkariko lanak bilduko ditu. Irratia entzuteko eta haren programetara zein podcastetara sartzeko aukera ere emango du.

Nafarpresen, Fundación Caja Navarraren eta Rural Citizenen arteko lankidetza-proiektu bat ere aurkeztu zuten. Tokiko hedabideen jarraipena mehatxatzen duten arriskuak identifikatzea eta proposamen zehatzak lantzea du helburu. Prozesuak sektorearen egoeraren diagnostikoa eguneratuko du, hedabideak eta komunitateak entzungo ditu, eta, elkarlanean, belaunaldi-erreleboa erraztuko duten eta informazio-basamortuak saihestuko dituzten eredu bideragarriak bilatuko ditu.

Jarraian, mahai-ingurua egin zuten, eta honako hauek hartu zuten parte: Jesús María Rodríguez Toki Administrazioko eta Despopulazioko zuzendari nagusiak; Jabier Aracama Euskarabideko zuzendari kudeatzaileak; Julio Iturri Landa Garapeneko eta Ingurumeneko Kabineteko buruak; eta Gorka Ovejero Arruazuko alkateak.

Tokiko prentsaren eta komunikazioarekin, despopulazioarekin, landa-garapenarekin eta hizkuntza-aniztasunarekin lotutako politika publikoen arteko harremana aztertu zuten topaketan.

Nafarpresen III. Sariak

Jardunaldiko une nagusietako bat Nafarpresen Sarien III. edizioko sari-banaketa izan zen. Nafarroako tokiko prentsarekin lotutako profesionalen, hedabideen eta eragileen lana, sormena eta ardura aitortzeko sortu zituzten sariak. Aurten 108 hautagaitza jaso dituzte, orain arteko kopururik handiena.

Nafarroako lurraldeetako errealitate soziala, kulturala eta ekonomikoa balioesten laguntzen duten kazetaritza-lanak, argazkiak, diseinu editorialak eta publizitate-lanak saritzen dituzte.

Hirugarren edizioko berrikuntza nagusia tokiko iragarle onenaren saria izan da. Nafarpresek tokiko hedabideak sostengatzen laguntzen duten enpresen eta establezimenduen konpromisoa aitortu nahi izan du kategoria horren bidez, publizitate-inbertsioaren bitartez egiten duten ekarpena nabarmenduta. Kategoria berriak agerian uzten du tokiko prentsaren eta Nafarroako herri eta eskualdeetako ekonomiaren arteko lotura estua.

Erreportaje onenaren saria David Preciado Laureosek jaso zuen, Plaza Nueva hedabidekoa, “Cobertura XXIV Galardones AER” lanagatik.

Elkarrizketa onenaren saria Erkuden Ruiz Barrosori eman zioten, Guaixe hedabidekoari, “Jende arruntaren historia” lanagatik.

Diseinu editorial onenaren kategorian, Gorka Morenok jaso zuen saria, Navarra Capital hedabidekoak, “Anuario Capital 2025” lanagatik.

Argazkilaritzaren atalean, Víctor Ruiz Navarra Capitalekoak Tokiko Hedabideetako Taldearen Argazki Onenaren saria jaso zuen, “Recolección del espárrago” lanagatik. Unai Beroiz Nietok, Diario de Noticias egunkarikoak, Kanpoko Profesional baten Argazki Onenaren saria jaso zuen, “Ibaiaren indarra / La fuerza del Río” lanagatik.

Publizitatearen arloan, Merkataritza Publizitateko Kanpaina Onenaren saria Sandra Goldáraz Molinetek jaso zuen, Entreto2 Tierra Estellakoa, “Ainhoa Egizabal” kanpainagatik. Publizitate Instituzionaleko Kanpaina Onenaren saria, berriz, Endika Irisori eman zioten, La Voz de la Merindad hedabidekoari, “¡Hazte mecenas de la Merindad!” kanpainagatik.

Azkenik, Tokiko Iragarle Onenaren saria Xapatero Tabernak jaso zuen, gertuko prentsarekiko konpromisoa aitortzeko. Eneritz Karasatorrek eta Garbiñe Karasatorek jaso zuten saria, establezimenduaren izenean.

Tokiko Prentsaren II. Eskola Sariak

Jardunaldian Tokiko Prentsaren II. Eskola Sariak ere banatu zituzten. Nafarpres-ek sustatutako ekimen horren bidez, belaunaldi berriei gertuko hedabideak ezagutarazi eta kazetaritzarekiko interesa piztu nahi diete.

Proiektuaren bitartez, ikasleak informazioaren arloko profesionalen lanera hurbildu nahi ditu elkarteak, pentsamendu kritikoa sustatu eta haien herri eta eskualdeetako errealitatea ezagutzen lagundu.

Bigarren edizioan Nafarroako bost ikastetxetako ehun ikasle inguruk hartu dute parte: Lizarra Ikastolak, Lizarran; Añorbeko HLHIPek; Martín de Azpilcueta HLHIPek, Barasoainen; Betelu Araxes HLHIPek, Betelun; eta Lakuntzako Herri Eskola HLHIPek, Lakuntzan. Sektoreak aurrean duen erronketako bati ere erantzuten dio ekimenak: publiko berriekin konektatzeko eta belaunaldi-erreleboa sustatzeko beharrari.

Albiste Onenaren saria Malen Peñak jaso zuen, Lakuntzako Herri Eskolako ikasleak. Elkarrizketa Onenaren saria, berriz, Luka Arcillak jaso zuen, Barasoainen dagoen Martín de Azpilcueta HLHIPeko ikasleak.

---