HizkuntzakAlbisteak
Nafarroako Gobernuak eta Topaguneak Nafarroan Euskaraldia proiektua sustatzeko hitzarmena berritu dute
«Hitzez ekiteko garaia» lelopean, Nafarroako Foru Komunitatean euskararen erabilera soziala sustatzea du helburu programak
Ana Ollo Herritarrekiko Harremanetarako kontseilariak eta Oskar Zapata Nafarroako Euskaltzaleen Topaguneko zuzendariak hitzarmena berritu dute gaur goizean, Euskaraldia 2022 Nafarroan ospatzeko, «Hitzez ekiteko garaia» lelopean.
Ekimena hainbat eragile sozial eta instituzionalen arteko ekintza bateratutik sortu da, eta euskararen erabilera bultzatzea eta erabilera horren aldeko jarrerak aktibatzea du helburu, herritarren hizkuntza-ohiturak azpimarratuz.
Hitzarmena 145.000 eurorekin hornitu da, eta programa koordinatzeko eta zabaltzeko, sustapen- eta sentsibilizazio-jardueretarako, ekitaldi publikoetarako eta erakunde eta udalerrietan sustatzeko erabiliko dira.
Kontseilariak ekitaldian azpimarratu du “euskara dela, batez ere, komunikaziorako bizirik dagoen tresna”. Eta, erantsi du “horregatik, hiztun berriekiko gure konpromisoa defendatzen dugun bezala, haien ospea eta sustapena bultzatzea aldera egunero lanean, babesten ditugu Euskaraldia bezalako ekimen hain garrantzitsuak”. “Proiektu honekin herritarrek frogatzen digute ekintza kolektiboak topiko interesatuak gainditu eta aukeren zein balioen mundu bat zabaltzeko ahalmena duela hizkuntzaren inguruan”, azpimarratu du.
Bestalde, Oskar Zapatak gogorarazi du Euskaraldiaren helburu nagusia dela euskararen erabilera hedatzea herritarren ohitura linguistikoak aldatuz eta aipatu du aurtengo leloa hizpide izatean “hitzez ekiteko garaia dela” eta “unea heldu dela kaleak hala nola plazak betetzeko euskaraz hitz egitea errazagoa izan dadin, ilusioz, erantzukizunez, gogotsu eta zirraraz”. Amaitzeko, lankidetza aldarrikatu du bermatze aldera “ahobizi eta belarriprest direnek aukera berriak dituztela, auzoz auzo, heriz herri eta arigunez arigune”.
Euskaraldiaren hirugarren edizioa Nafarroan
Euskaraldiaren aurreko ediziotan ahobizi eta belarriprest rolak tarteko milaka pertsonek parte hartu zuten.
Ahobizi dira ulertzen duten pertsona guztiekin euskaraz mintzatzen direnak, eta ulertzen duten edo ez zalantzazkoa denean, beti lehen hitzak hizkuntza honetan esaten dituzte.
Belarriprest izenekoak, bestalde, euren gaitasunen eta aukeren arabera, euskaraz noiz eta norekin hitz egin erabakitzen dutenak dira. Ez dute beti hitz egiten euskaraz ulertu ahal duten pertsona guztiekin, baina euren borondatea da euskaraz dakitenek beraiekin une orotan hizkuntza honetan mintzatzea.
Gainera, sustatzen dira "ariguneak": alegia sektore mota orotako dozenaka erakundeen atxikipenari esker une orotan euskaraz espresatzeko aukera bermatzen duten guneak.
