Albisteak

Nafarroako Gobernuak eta Taupa euskaltzaleen mugimendua euskararen erabilera soziala sustatzeko lankidetza indartu dute

Nafarroako euskararen erabilera soziala indartzeko helburuarekin, lankidetza hitzarmena sinatu dute Nafarroako Gobernuko lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok eta Taupa euskaltzaleen mugimenduko Nafarroako koordinatzaile Oskar Zapatak. Hitzarmena Euskarak 365 egun programa garatzeko eta hurrengo Euskaraldia diseinatzeko aukera emango du, besteak beste.

Euskarak 365 egun programaren helburu nagusia hiztunen artean euskararen erabilera bultzatzea eta gizartean euskaltzaletasuna sustatzea da. Aurten hitzarmen honen bidez Euskaraldiaren gainean egin den ikerketaren parte bat finantzatuko da, hurrengo edizioa martxan jartzeko egin beharreko aktibazio lana eta horrekin batera bi iniziatiba berri: Eusfera eta Gau Beltza.

Nafarroako Jauregian egindako sinadura ekitaldian, Euskarabidea-Euskararen Nafar Institutuko zuzendari-kudeatzaile Javier Arakama; Taupako Koordinatzaile orokorra den Jasone Mendizabal; eta Uxue Izco, maiatzaren 1etik aurrera Oskar Zapatak utziko duen lekukoa hartuko duen Nafarroako koordinatzaile berria.

Ollo lehendakariordea eta Zapata bat etorri dira erakunde publiko eta eragile sozialen arteko elkarlana azpimarratzean, bide horretan sinatu baita hitzarmen hau,  erabilera soziala eta euskaltzaletasuna sustatzeko helburuarekin. Hitzarmena 200.000 eurokoa izango da. Laburbilduz, helburua euskaltzaleak biltzea, aktibatzea, saretzea eta eragile izateko antolatzen laguntzea da. Herritarrei era guztietako proposamenak luzatuz eta askotariko egiturak sortzeko laguntza eskainiz.

Proiektu berriak: Eusfera eta Gau Beltza

Eusfera egitasmo berriak haurren ekosistema linguistikoan eragitea bilatuko du gurasoen inplikazioaren bitartez. Horretarako askotariko tresnak eta proposamenak helaraziko zaizkiei gurasoei haurrekin partekatzen dituzten espazioetan euskara presenteago egon dadin. Hau da, haur euskaldunen hizkuntza ekosisteman eragin positiboa izango duten aldaketak bultzatzea. Haurren unibertsoa euskaldunagoa izateko aurrerapausoak ematea, hein batean, gurasoak aktibatuz hauek haurren unibertsoan eragiteko. Bestetik, “Euspazioak” deituriko sozializaziorako elkarguneak izango da, familiak elkartu ahalko diren guneak izanen dira, euskarara hurbiltzeko aukera emanen dutenak.

Ekimenak mugarri garrantzitsua izanen du maiatzaren 7tik eta 17ra bitartean. Egun horietan Taupak gonbidapen berezia luzatuko die gurasoei, horiek espazioa kalean, era zein modu kolektiboan eraikitzeko eta partekatzeko: mendi irteerak, plaza-jokoak, meriendak, kontzertuak, antzerkia... Eusferan, Taupak Nafarroako Gobernuaren babesaz gain, NIZE, Ikastolen elkartea, Sortzen, euskara zerbitzu  eta euskara elkarteen laguntza eta konplizitatea izango du. Hala ere, 2025 - 2026 ikasturtean zehar martxan egongo den ekimena da Eusfera eta Taupa ikasturtean zehar bere antolaketaz eta gurasoekin egin beharreko sentsibilizazio eta ahalduntze lanaz arduratuko da.

Bestalde, udazkenera helduta Gau Beltza egitasmoak hartuko du protagonismoa. Dagoeneko, Nafarroan zehar hainbat auzo eta herrietan egiten den ekimena da. Azken urteetan Tauparen egitekoa ekimena bere herrian antolatu nahi duen horri baliabideak eta ideiak eskaintzea izan da,  nahi eran ospatu dezaten. Aurten urrats bat gehiago emango da, batetik sentsibilizazio lana egingo du Taupak Gau Beltzari lotzen zaizkion baloreetan oinarriturik: komunitatea, aisialdi ez kontsumista, betaurreko moreak, gazteak erdigunera....eta euskaraz; eta, bestetik, Gau Beltzari ikusgarritasuna emateko ekitaldi indartsu bat antolatuko dute Iruñeko bihotzean, urriaren 31an bertan.

Euskaraldiari loturik ere, esan bezala, 2026an zehar bi lan ildo jorratuko dira hitzarmenak hartzen duenaren arabera. Batetik, Euskaraldiaren epe luzerako begirada eta estrategia definitzeko gogoeta prozesua; eta, bestetik, Euskaraldiaren 5. edizioa martxan jartzeko egin beharreko sustapen lana. 

---