Albisteak

Nafarroako Gobernuak hizkuntza-politika arloko konpromisoa berritu du 2021eko Hiruko Itunarekin

Nafarroako Gobernuko Herritarrekiko Harremanetako kontseilari Ana Ollok, Eusko Jaurlaritzako Kultura eta Hizkuntza Politika Saileko Bingen Zupiria sailburuak eta Euskararen erakunde publikoa-Office public de la langue basque-ko lehendakari Antton Curutcharryk Hiruko Ituna hitzarmeneko jarduera-plana sinatu dute 2021. urterako, eta, era horretan, hizkuntza-politikaren arloan modu koordinatuan lanean jarraitzeko konpromisoa berritu dute Hiruko Ituna Hitzarmenaren bidez

2017-2021 denboraldian indarrean den lankidetza-hitzarmen honen helburu nagusia da hizkuntza-politikarekin loturiko gaietan mugaz gaindiko lankidetza garatzeko borondatea berrestea hiru sinatzaileen artean, eta, horrekin batera, erakunde-mailan harreman iraunkorrak finkatzea eta garatzen jarraitzea.

Aurtengo urterako helburua, berriz, urteko jarduera-plan espezifikoa ezartzea da, euskara sustatzeko hiru erakundeen artean lankidetza garatzen jarraitzearren. Modu horretan, lanerako bost arlo espezifikotan jorratuko da: helduentzako euskararen hezkuntza eta irakaskuntza, euskararen erabilera sustatzea, euskararen aldeko hausnarketa egitea eta hori sustatzea, ikerketa soziolinguistikoak eta lankidetza Europako esparruan.

2021. urterako jarduera-plana ezohiko moduan sinatu da; hots, telematikoki sinatu dute hiru alderdiek, COVID-19ak sortutako egoera medio. Hiru aldeak, gainera, hitzarmen berria jada prestatzen ari dira beste lau urteko denboraldirako (2021-2025).

Helduentzako euskararen hezkuntza eta irakaskuntza

Hezkuntza-arloan, hiru aldeek adostu dute Euskal Autonomia Erkidegoko unibertsitateetan eta goi-mailako eskoletan (EAE eta Nafarroa), euskaraz ikasten jarraitu nahi duten Iparraldeko ikasleei sarbidea errazten jarraitzea.

Helduei euskara irakasteari dagokionean, aldeek adostu dute arlo horretan lan egiten duten irakasleei erakunde bakoitzak antolatutako prestakuntza-ekintzetan parte hartzea eskaintzea. Horrez gain, honako hauek ere adostu dituzte: HABE liburutegiak dokumentuen hornidura erraztea Euskararen erakunde publikoa-Office public de la langue basque eta Euskarabidean lan egiten duten teknikariei, teknikarien dokumentazio-premiei aurre egitea, kontsulta telematiko espezifikoak erantzutea bibliografia xehatua eskainiaz eta Alerten zerbitzu pertsonalizatua eskaintzea.

Hizkuntza Gaitasunen ziurtagiriari dagokionez, aldeek adostu dute Eusko Jaurlaritzak Iparraldeko B1 mailaren eta Nafarroako B2 mailaren ziurtagiriaren homologazioa 2021ean argitaratzea. Era berean, aldeek adostu dute ikaskuntza-prozesu horiek ebaluatzeko eta egiaztatzeko irizpideak, tresnak eta faseak behar bezala egituratzen eta harmonizatzen hastea, eta euskaltegietako irakasleentzat eta egiaztapenetan adituak direnentzat batera lan egiteko eremuak antolatzen hastea.

Euskararen erabilera sustatzea

Mugaz gaindiko egonaldien inguruan, aldeek adostu dute hiru lurraldeetan dauden ekimen eta aukera ezberdinak aztertzea, eta, ondoren, mugaz haraindiko proiektu esperimental bat euskaraz egiteko aukera analizatzea. Halaber, adostu dute elkarrekin aztertzea mugaz gaindiko ekimenak sustatzeko eta laguntzeko eskaerak.

Kirolari dagokionean, aldeek adostu dute kirolean euskara sustatzeko hiru lurraldeetan dauden planak eta estrategiak partekatzea, eta, horrekin batera, EAEko kirol-arloko teknikari eta entrenatzaileentzat sortutako euskarazko baliabideak eta materialak partekatzea.

Ingurune digitalari buruz, hizkuntza-teknologiaren eta ingurune digitalaren arloan bultzatzen ari diren proiektuak partekatzea adostu dute; zehazki, Euskararen Aholku Batzordearen ingurune digitalean Euskara Sustatzeko Batzorde Bereziak egindako lanak eta hizkuntza-teknologian egingo diren proiektuak. Horrez gain, Wikipedian euskarazko edukiak eta horien erabilera garatzeko elkarrekin proiektu bat burutzeko aukeraren bideragarritasuna aztertzea eta hiru aldeen artean alde bakoitzak Wikilarien Elkartearekin lantzen dituen planak eta proiektuak partekatzea. Azkenik, hiru lurraldeetako haur eta gazteentzat telematikoki garatutako jarduera digitalen saioa egiteko proiektu esperimentala posible den aztertzea ere erabaki dute.

Arlo sozio-ekonomikoari dagokionez, aldeek adostu dute, euskara sustatzeko praktikei eta dispositiboei buruz egindako diagnostikoa oinarri hartuta, enpresei laguntzeko gailu komunak edo espezifikoak aztertzea, lurralde bakoitzeko errealitatea kontuan hartzen dutenak, eta arlo horretan euskararen erabilera garatzeko metodologia definitzeko lanei buruzko informazioa partekatzea.

Komunikabideei dagokienean, aldeek adostu dute euskarazko komunikabideen sustapeneko praktikak eta estrategiak partekatzea hiru lurraldeetan eta audientzia batera neurtzeko aukera aztertzea.

Euskararen aldeko hausnarketa eta horren sustapena

Euskararen alde sentsibilizatzeari eta hori sustatzeari dagokionez, hiru aldeek adostu dute euskararen lurralde osoan bultzatutako “Euskaraldia” proiektuaren Koordinazio Batzordean parte hartzea. Horrez gain, familia-transmisioari buruzko lanak partekatzea adostu dute eta proiektu komunak edo bateratuak garatzeko aukerak aztertzea.

Halaber, hiru aldeek adostu dute bakoitzak sortutako hausnarketa-guneetan parte hartzea.

Ikerketa soziolinguistikoak

Hiru aldeek adostu dute Euskararen Adierazle Sistema (EAS) elkarrekin garatzen jarraitzea; hots, hiru aldeek elkarlanean sortua, eta adierazleen sistema egokitzeko lan egitea. Bestalde, VII. Inkesta Soziolinguistikoa egitea eta Euskaraldiaren 2020ko edizioari buruzko azterketaren emaitzak hedatzeko plangintza elkarrekin antolatzea ere adostu dute.

Lankidetza Europako esparruan

Hiru aldeek adostu dute Europako finantzaketetara proiektuak aurkezten jarraitzea eta POCTEFAren etorkizuneko programa eragileetan hizkuntza-politika sartzeko elkarrekin lan egitea.

---